అమెరికా రియల్‌ఎస్టేట్ రంగంలో విచిత్ర పరిస్థితులు!

అమెరికాలో గృహ విక్రయ రంగంలో ఎన్నడూలేని విచిత్ర పరిస్థితులు నెలకొన్నాయి. మార్ట్‌గేజ్ (గృహ రుణ) వడ్డీ రేట్లు రికార్డు స్థాయిలో ఎగబాకడంతో దేశవ్యాప్తంగా పాత ఇళ్ల అమ్మకాలు గత 16ఏళ్లలో ఎన్నడూ లేనంత కనిష్ఠ స్థాయికి పడిపోయాయి. అయితే ఒకవైపు విక్రయాలు దారుణంగా క్షీణిస్తున్నప్పటికీ, మరోవైపు ఇళ్ల ధరలు మాత్రం ఏమాత్రం తగ్గకుండా పైపైకే దూసుకుపోతుండటం ఆర్థిక నిపుణులను సైతం విస్మయానికి గురిచేస్తోంది. నేషనల్ అసోసియేషన్ ఆఫ్ రియల్టర్స్ (NAR) గురువారం విడుదల చేసిన తాజా గణాంకాల ప్రకారం, అక్టోబర్ మాసంలో పాత ఇళ్ల అమ్మకాలు సెప్టెంబర్‌తో పోలిస్తే 5.5శాతం తగ్గి వార్షిక ప్రాతిపదికన 3.75 మిలియన్ యూనిట్లకు పరిమితమయ్యాయి.