Spirituality: మంత్రం అంటే ఏమిటి?..

మంత్రం అంటే కేవలం కొన్ని పదాలను పదేపదే పలకడం కాదు. భారతీయ ఆధ్యాత్మిక సంప్రదాయంలో మంత్రానికి ఎంతో లోతైన అర్థం ఉంది. సంస్కృతంలోని 'మన్' అంటే మనస్సు అని, 'త్ర' అంటే రక్షణ లేదా విముక్తికి సంబంధించిన భావాన్ని సూచిస్తుందని చెబుతారు. అందుకే మంత్రం అంటే మనస్సును చంచలమైన ప్రాపంచిక ఆలోచనల నుంచి క్రమంగా ఏకాగ్రత వైపు నడిపించే పవిత్ర ధ్వని అని ఆధ్యాత్మిక శాస్త్రాలు వివరిస్తాయి.

మంత్రాన్ని 'మననం + త్రాయతే' అని కూడా వివరిస్తారు. మననం అంటే పదేపదే స్మరించడం, జపించడం. త్రాయతే అంటే రక్షించడం. అంటే భక్తితో, నియమంతో మంత్రాన్ని జపించే సాధకుడి మనస్సుకు ఆధారంగా నిలిచి, అతడిని అంతర్ముఖంగా నడిపించేదే మంత్రం అనే భావన ఉంది. అంటే మనస్సును, ప్రాణాన్ని ఒకే దిశలో నడిపించే సాధనే మంత్రజపం అని వేదోత్తములు చెబుతున్నారు.