Spirituality: ధర్మం క్షీణించిన ప్రతి యుగంలో పరమాత్మ అవతరిస్తాడని అంటారు నిజమేనా?..

యుగయుగాల్లో పరమాత్మ భగవంతునిగా అవతరిస్తాడని మన ధార్మిక సంప్రదాయం చెబుతోంది. ఇక వేదాల్లో పరమాత్మను ఒకే రూపానికి పరిమితమైన వ్యక్తిగా కాకుండా.. సమస్త సృష్టిలో వ్యాపించి ఉన్న పరమ సత్యంగా దర్శించారు. ఋగ్వేదంలోని పురుషసూక్తం విశ్వమంతటినీ ఆవరించి ఉన్న మహాపురుషుడి స్వరూపాన్ని వర్ణిస్తుంది.

అలాగే విష్ణు సూక్తం ప్రకారం... శ్రీమహావిష్ణువు వేసిన ఆ మూడు మహత్తర అడుగులు, ఈ సమస్త విశ్వాన్నీ ఆవరించిన అనంత తత్త్వానికి ప్రతీక. భగవంతుడనేవాడు ఏ ఒక్క స్థానానికో, నిర్దిష్ట ప్రాంతానికో పరిమితమైన శక్త్యంతరం కాదు... సమస్త విశ్వంలోనూ, అణువణువునా వ్యాపించి ఉన్న దివ్య చైతన్యమని వేదం స్పష్టం చేస్తోంది.