మాయా బంధంలో జీవుడు ఎలా చిక్కుకుంటాడు?

ఈ భౌతిక ప్రపంచంలో మనిషి అనుభవించే ప్రతి సుఖం వెనుక ఒక కోరిక ఉంటుంది.. ప్రతి దుఃఖం వెనుక ఒక బంధం ఉంటుంది. నేను అనే భావన బలపడిన కొద్దీ, జీవుడు తన అసలు స్వరూపానికి దూరమవుతాడు. తాను ఈ శరీరం కాదని, పరమాత్మతో నిత్య సంబంధం కలిగిన జీవాత్మనని మరచిపోయిన క్షణం నుంచే మాయా బంధం మొదలవుతుంది.

శ్రీకృష్ణ తత్త్వం ప్రకారం జీవాత్మ భౌతిక ప్రకృతిలో పుట్టింది కాదు. అది కృష్ణుని పరాశక్తికి చెందిన నిత్యమైన అణు స్వరూపం. కానీ కృష్ణుని పట్ల విముఖత కలిగినప్పుడు, భౌతిక ప్రకృతి జీవుడిని తన గుణాలతో ఆవరించుకుంటుంది. అప్పుడు నేనే భోక్తను.. నేనే కర్తను.. నేనే నియంత్రకుడిని అనే అహంకారం అతడి చైతన్యాన్ని కప్పివేస్తుంది. అదే బంధనానికి మూలం.. అదే భౌతిక దుఃఖానికి కారణం.