ధ్యానం చేస్తుంటే వేరే ఆలోచనలు వస్తున్నాయా?..

ధ్యానం చేస్తున్నప్పుడు మనసులో ఏవో ఒక ఆలోచనలు రావడం చాలా సహజం. అలా ఆలోచనలు వచ్చిన ప్రతిసారీ అయ్యో! నా ధ్యానం పాడైపోయింది అని ఆందోళన చెందాల్సిన అవసరం ఎంత మాత్రమూ లేదు. అసలు ధ్యానం అంటే ఆలోచనలను బలవంతంగా ఆపేయడం కాదు. మనస్సు అనేది ఒక పరికరం మాత్రమే. అది ఇన్నాళ్లూ తనకిష్టమొచ్చినట్లు పరిగెత్తి అలవాటు పడింది..

పతంజలి మహర్షి యోగసూత్రాలలో యోగానికి ఇచ్చిన నిర్వచనం చిత్తవృత్తి నిరోధం.. అంటే మన చిత్తం అడుగు పొరల్లో, ఎన్నో జన్మల సంస్కారాలు దాగి ఉంటాయి. మన సైకాలజీ చెప్పే సబ్‌కాన్షస్ మైండ్ లాంటిదే ఈ చిత్తం. సరస్సు అడుగున ఏర్పడిన బుడగలు పైకి ఉబికి వచ్చినట్లుగా.. ఆ సంస్కారాల నుంచే ఆలోచనలు పుట్టుకొస్తూ ఉంటాయి. ఆ ఆలోచనల్లో పడి కొట్టుకుపోకుండా ఉండటమే మనం చేయాల్సిన మొదటి పని.