కాంగ్రెస్ ప్రజాప్రతినిధులు ప్రైవేట్ భూముల్లోకి రావడం చట్టవ్యతిరేకం

ప్రదీప్ రెడ్డికి చెందిన జన్వాడ ఫాంహౌస్ పై కాంగ్రెస్ ప్రజాప్రతినిధులు దాడికి రావడం దుర్మార్గం అని అడ్వకేట్ రాజేశ్వరరావు మండిపడ్డారు. ప్రదీప్ రెడ్డి చట్ట వ్యతిరేకంగా ఎలాంటి పనులకు పాల్పడలేదని ఆయన తెలిపారు. దశాబ్దాల చరిత్ర ఉన్న కాంగ్రెస్ పార్టీ... ఈ విధంగా ప్రైవేట్ వ్యక్తి భూమిపైకి రావడం ఏంటి? అని ప్రశ్నించారు. ప్రైవేట్ వ్యక్తిపై దాడికి రావడం అంటే రాజ్యాంగంపై దాడి చెయ్యడమే అని అన్నారు. 3, 4 ఎకరాల్లో ఉన్న ఫాంహౌస్ పై కాంగ్రెస్ ఎంపీలు, ఎమ్మెల్యేలు దాడికి వచ్చారని రాజేశ్వరరావు ఆరోపించారు. చట్టాల గురించి మాట్లాడే నైతిక హక్కు కాంగ్రెస్ పార్టీకి లేదన్నారు. కాంగ్రెస్ ఎంపీలు, ఎమ్మెల్యేలు ప్రైవేట్ భూముల్లోకి రావడం చట్ట వ్యతిరేకం అని వ్యాఖ్యానించారు.