జూన్ నాటికి కూసుమంచి 100 పడకల ఆసుపత్రిని సిద్ధం చేయాలి- మంత్రి పొంగులేటి

Khammam: ఖమ్మం జిల్లా పాలేరు నియోజకవర్గం పర్యటనలో భాగంగా ఏదులాపురం మున్సిపాలిటీ, కూసుమంచి, తిరుమలాయపాలెం మండలాల్లో పర్యటించారు రాష్ట్ర రెవెన్యూ శాఖ మంత్రి పొంగులేటి శ్రీనివాస రెడ్డి. పలు అభివృద్ది పనులకు శంకుస్థాపనలు చేశారు. రెండో విడత ఇందిరమ్మ ఇళ్ల లబ్ధిదారులకు మంజూరు పత్రాలను అందజేశారు.

కూసుమంచి మండల కేంద్ర సమీపంలోని గంగ బండ తండా వద్ద రూ.45 కోట్లతో నిర్మిస్తున్న 100 పడకల ఏరియా ఆసుపత్రి పనులను మంత్రి పరిశీలించారు. నిర్దిష్ట గడువు మేరకు జూన్ నెల నాటికి శరవేగంగా పనులు పూర్తి చేసి ఆసుపత్రిని అందుబాటులోకి తేవాలని అధికారులను, కాంట్రాక్టర్ ను ఆదేశించారు. ఆ తర్వాత సుమారు రూ.3.20 కోట్ల అంచనా వ్యయంతో ఏదులాపురం మున్సిపాలిటీ 14,15,16 వార్డుల్లో చేపట్టిన అంతర్గత సీసీ రోడ్ల నిర్మాణానికి శంకుస్థాపన చేశారు.