బాపు బొమ్మ సాక్షిగా.. బరితెగించిన మందు మాఫియా.. డ్రైడే నాడు ‘బ్లాక్‌’ దందా

Liquor Mafia: జాతిపిత మహాత్మా గాంధీ జీవితాంతం మద్యం మహమ్మారికి వ్యతిరేకంగా పోరాడారు. సమాజం మద్యానికి దూరంగా ఉండాలన్న ఆయన ఆశయాలను గౌరవిస్తూ ప్రభుత్వం ఏటా అక్టోబర్ 2న డ్రై డే పాటిస్తుంది. కానీ రాజధాని నగరంలో క్షేత్రస్థాయి పరిస్థితి చూస్తే జాతిపిత ఆశయాలు బస్తీ సందుల్లో బూడిదపాలవుతున్నాయి. అధికారికంగా వైన్‌షాపులు, బార్లకు తాళాలు పడినా.. గల్లీల్లో మాత్రం మద్యం వ్యాపారం మూడు పువ్వులు ఆరు పెగ్గులుగా సాగుతోంది. బోర్డులకే డ్రైడే పరిమితమైందని, తమ దందాకు కాదంటూ అక్రమార్కులు యథేచ్ఛగా బరితెగించి విక్రయాలు సాగిస్తున్నారు.