గజ్వేల్ తహసీల్దార్‌పై సస్పెన్షన్ వేటు.. రైతును అవహేళన చేయడంపై కలెక్టర్ సీరియస్!

రాష్ట్రవ్యాప్తంగా తీవ్ర సంచలనం సృష్టించిన సిద్దిపేట జిల్లా గజ్వేల్ తహసీల్దార్ వివాదంపై రాష్ట్ర ప్రభుత్వం, జిల్లా యంత్రాంగం కఠిన చర్యలు తీసుకున్నాయి. భూ సమస్యతో కార్యాలయానికి వచ్చిన రైతును చూసి ‘నువ్వింకా బతికే ఉన్నావా? పురుగుల మందు తాగలేదా?’ అంటూ అవహేళన చేసిన తహసీల్దార్ చిట్టంపల్లి స్వామి వ్యవహారశైలిపై తీవ్ర విమర్శలు వెల్లువెత్తిన సంగతి తెలిసిందే. ఈ ఘటనపై విచారణ జరిపిన రెవెన్యూ డివిజనల్ అధికారి (RDO) సమర్పించిన నివేదిక ఆధారంగా కలెక్టర్ తహసీల్దార్‌ను సస్పెండ్ చేస్తూ తక్షణ ఉత్తర్వులు జారీ చేశారు.