సమగ్ర, లోతైన విశ్లేషణతోనే నేరాల నియంత్రణ-డీజీపీ సీవీ ఆనంద్

DGP CV Anand: అన్ని యూనిట్ల పోలీసు ఉన్నతాధికారులతో డీజీపీ కార్యాలయంలో నిర్వహించిన అర్ధవార్షిక నేర సమీక్ష సమావేశంలో పోలీసు అధికారులకు దిశానిర్దేశం చేశారు డీజీపీ సీవీ ఆనంద్. నేరాల దర్యాప్తు, పోలీసింగ్‌లో వృత్తి నైపుణ్య ప్రమాణాలను తప్పనిసరిగా పాటించాలని చెప్పారు. నేరాల సమీక్షను కేవలం గణాంకాలకే పరిమితం చేయకుండా ప్రతి నేరం వెనుక కారణాలు, దర్యాప్తు తీరు, ఆయా కేసుల పరిష్కారాన్ని సమగ్రంగా విశ్లేషించాలని సూచించారు. సీసీటీఎన్‌ఎస్‌పై ప్రత్యేకంగా దృష్టి పెట్టడంతో గతంలో 70 నుంచి 80 శాతంగా ఉన్న సీసీటీఎన్‌ఎస్‌ డేటా అప్‌డేట్‌.. అధికారులు, సిబ్బంది కృషితో 96 శాతానికి చేరడం అభినందనీయం అని డీజీపీ అన్నారు.