షాద్‌నగర్‌లో జింక మాంసం కలకలం..! 13 కిలోల మాంసం, రైఫిల్ స్వాధీనం

Deer Meat: రంగారెడ్డి జిల్లా షాద్‌నగర్‌లో జింక మాంసం తరలింపు కలకలం రేపింది. షాద్‌నగర్ పట్టణ శివారులోని రాయికల్ టోల్ ప్లాజా వద్ద జింక మాంసాన్ని పట్టుకున్నారు. అటవీశాఖ అధికారులకు అందిన సమాచారం మేరకు ఎస్ఓటీ (స్పెషల్ ఆపరేషన్స్ టీమ్) పోలీసులు టోల్ ప్లాజా వద్ద నిఘా పెట్టి జింక మాంసాన్ని తరలిస్తున్న ముఠాను అదుపులోకి తీసుకున్నారు.

పోలీసుల అదుపులో 8మంది

8మందిని అదుపులోకి తీసుకున్న పోలీసులు వారి నుంచి 13 కిలోల జింక మాంసంతో పాటు వేటకు ఉపయోగించినట్లు అనుమానిస్తున్న రైఫిల్, రెండు కార్లు స్వాధీనం చేసుకున్నారు. నిందితులను కొత్తూరు పోలీస్ స్టేషన్ కు తరలించారు పోలీసులు. అటవీశాఖకు చెందిన ప్రత్యేక బృందం పోలీస్ స్టేషన్ కు చేరుకుంది. పోలీసులు, అటవీ శాఖ అధికారులు అనుమానితులను విచారిస్తున్నారు.