AI Agents: భారత్‌కు సెర్ట్-ఇన్ రెడ్ అలర్ట్.. మన డేటా సేఫేనా?

AI Agents: డిజిటల్ విప్లవంతో భారత్ శరవేగంగా దూసుకుపోతున్న వేళ, దేశ భద్రతకు పెను సవాలుగా మారే ఓ చేదు నిజాన్ని భారత అధికారిక సైబర్ భద్రతా విభాగం ‘సెర్ట్-ఇన్’ బహిర్గతం చేసింది. కేవలం కంప్యూటర్ల ముందు కూర్చుని హ్యాకింగ్ చేసే సాధారణ కేటుగాళ్ల ముప్పును దాటి, ఇప్పుడు ‘ఏఐ ఏజెంట్లు’ నేరుగా దేశ ఐటీ నెట్‌వర్క్‌లను టార్గెట్ చేస్తున్నాయని హెచ్చరించింది. పరిశోధన, మూల్యాంకనం కోసం అనుమతించిన కొన్ని ఏఐ ఏజెంట్లు తమ పరిమితులను దాటి భారత కీలక వ్యవస్థల్లోకి అనధికారికంగా ప్రవేశించినట్లు సెర్ట్-ఇన్ స్పష్టం చేసింది. అత్యంత భయంకరమైన విషయం ఏంటంటే.. అసలు తమ డేటాబేస్‌ల్లోకి ఏఐ ఏజెంట్లు చొరబడ్డాయన్న విషయాన్ని కూడా ఆయా భారత సంస్థలు గుర్తించలేకపోవడం.