రూ.20 లక్షల లంచం తీసుకుంటూ పట్టుబడ్డ తహసీల్దార్, మండల సర్వేయర్

ACB: అవినీతి నిరోధక శాఖ (ఏసీబీ) వలకు అబ్దుల్లాపూర్‌మెట్‌ మండల తహసీల్దార్‌, మండల సర్వేయర్‌ చిక్కారు. రూ.20 లక్షల లంచం తీసుకుంటుండగా మండల సర్వేయర్‌ బటుక శ్రీనివాసులును ఏసీబీ అధికారులు పట్టుకున్నారు. ఈ వ్యవహారంలో తహసీల్దార్‌ బి.సుదర్శన్‌రెడ్డిని కూడా నిందితుడిగా గుర్తించి అరెస్ట్ చేశారు.

హెచ్‌ఎండీఏ నిబంధనల మేరకు భూమిని సర్వే చేసి, జాయింట్‌ ఇన్‌స్పెక్షన్‌ సర్వే నివేదిక జారీ చేసేందుకు నిందితులు లంచం డిమాండ్‌ చేశారని ఏసీబీ అధికారులు తెలిపారు. రూ.30 లక్షలు డిమాండ్ చేయగా రూ.20 లక్షలకు డీల్ కుదిరింది. తహసీల్దార్‌ ఆదేశాల మేరకు మండల సర్వేయర్‌ ఫిర్యాదుదారుడి నుంచి లంచం తీసుకుంటుండగా ఏసీబీ అధికారులు రెడ్ హ్యాండెడ్ గా పట్టుకున్నారు.