రాజ్యాంగంలోని 10వ షెడ్యూల్‌ను వెంటనే సవరించాలి

Vinod Kumar: రాజ్యాంగంలోని 10 షెడ్యూల్ ను సవరించాలని మాజీ ఎంపీ బోయినపల్లి వినోద్ కుమార్ కేంద్ర ప్రభుత్వాన్ని డిమాండ్ చేశారు. పార్టీలు మార్చే ఎమ్మెల్యేల అనర్హతపై అసెంబ్లీ స్పీకర్ నిర్ణయం తీసుకునేందుకు నిర్ణీత గడువు విధించాలని ఆయన అన్నారు. 10వ షెడ్యూల్ లో నిర్ణీత గడువు లేనందున చట్టంలోని లొసుగులను ప్రజా ప్రతినిధులు వాడుకుంటున్నారని ఆయన వ్యాఖ్యానించారు. ఖైరతాబాద్ ఎమ్మెల్యే దానం నాగేందర్ విషయంలో రెండున్నరేళ్లు సమయం వృధా అయిందని ఆవేదన వ్యక్తం చేశారు.

గురువారం తెలంగాణ భవన్ లో మీడియాతో మాట్లాడిన వినోద్ కుమార్.. 10 షెడ్యూల్ లో ఉన్న లొసుగులను అడ్డం పెట్టుకొని ప్రజాప్రతినిధులు ఆ చట్టాన్ని దుర్వినియోగం చేస్తున్నారని ఆరోపించారు. ఒక పార్టీ నుంచి గెలిచి మరో పార్టీలోకి వెళ్లిన ఎమ్మెల్యేలపై అసెంబ్లీ స్పీకర్ వెంటనే చర్యలు తీసుకోవాల్సి ఉన్నప్పటికీ.. పదవ షెడ్యూల్ లో చర్యలపై నిర్ణీత గడువు విధించకపోవడం వల్ల ఇష్టారీతిన అసెంబ్లీ స్పీకర్స్ సమయం తీసుకుంటున్నారని వినోద్ కుమార్ పేర్కొన్నారు.