AP Politics: డీఎస్సీపై టీడీపీ దూకుడు.. మరి బీజేపీ, జనసేన ఎందుకు సైలెంట్?

AP Politics: ఆంధ్రప్రదేశ్‌లో డీఎస్సీ వ్యవహారం రాజకీయంగా వేడెక్కుతోంది. తాజా నియామకాల్లో అవకతవకలు జరిగాయంటూ వైసీపీ చేస్తున్న విమర్శలు ఒకవైపు ఉంటే.. ఎలాంటి అక్రమాలకు తావులేదని, ఎవరైనా కంప్లైంట్ చేస్తే నిబంధనల ప్రకారం విచారణ చేపడతామని ప్రభుత్వం స్పష్టం చేస్తున్న తీరు మరోవైపు కనిపిస్తోంది. ఈ వ్యవహారంపై అధికార యంత్రాంగం వివరణలు ఇస్తుండగా.. రాజకీయంగా మాత్రం టీడీపీ నేతలే ఎక్కువగా వైసీపీపై ఎదురుదాడి చేస్తున్నారు.

ఇదే సమయంలో టీడీపీ కూటమి ప్రభుత్వంలో భాగస్వాములైన జనసేన, బీజేపీ వైపు నుంచి డీఎస్సీ అంశంపై పెద్దగా రాజకీయ స్పందన కనిపించకపోవడం కొత్త చర్చకు దారితీస్తోంది. కూటమిలో మూడు పార్టీలు ఉన్నప్పటికీ.. ఈ వివాదాన్ని టీడీపీ మాత్రమే ముందుండి ఎదుర్కొంటోందనే అభిప్రాయాలు సాధారణ ప్రజల నుంచి వినిపిస్తున్నాయి.

డీఎస్సీ చుట్టూ ముదురుతున్న రాజకీయ వేడి

డీఎస్సీ నియామక ప్రక్రియలో అక్రమాలు జరిగాయని వైసీపీ నేతలు తీవ్ర ఆరోపణలు చేస్తున్నారు. ముఖ్యంగా స్పోర్ట్స్ కోటాకు సంబంధించిన అంశాల్లో అవకతవకలు జరిగాయంటూ కొన్ని ఆధారాలను ప్రస్తావిస్తూ ప్రభుత్వాన్ని ఇరుకున పెట్టే ప్రయత్నం చేస్తున్నారు.